दिंडोरीत २६ शाळांतील सर्व शिक्षक बीएलओ कामावर; विद्यार्थ्यांच्या शिक्षणावर परिणामाची भीती

दिंडोरीत बीएलओ नियुक्तीमुळे शिक्षणावर परिणाम? २६ शाळांतील सर्व शिक्षक निवडणूक कामावर; पालकांमध्ये नाराजी

दिंडोरी | प्रतिनिधी

नाशिक जिल्ह्यातील दिंडोरी विधानसभा मतदारसंघात विशेष सखोल पुनरीक्षण (SIR) मोहिमेसाठी शिक्षकांची सहायक बीएलओ (Assistant BLO) म्हणून नियुक्ती करण्यात आल्याने विद्यार्थ्यांच्या शिक्षणावर परिणाम होण्याची शक्यता व्यक्त होत आहे. तालुक्यातील तब्बल २६ शाळांमधील सर्व शिक्षकांना या कामाचे आदेश देण्यात आल्याची माहिती समोर आल्यानंतर पालक आणि शिक्षकांमध्ये नाराजीचे वातावरण निर्माण झाले आहे.

नवीन शैक्षणिक वर्ष नुकतेच सुरू झाले असताना अध्यापनाऐवजी शिक्षकांना मतदार यादी पुनरीक्षणाच्या कामात गुंतविण्यात आल्याने विद्यार्थ्यांचे शैक्षणिक नुकसान होण्याची भीती व्यक्त केली जात आहे. अनेक शाळांमध्ये सर्वच शिक्षक निवडणूक कामावर गेल्यास विद्यार्थ्यांना शिकविणार कोण, असा प्रश्न पालकांकडून उपस्थित केला जात आहे.

माहितीनुसार, दिंडोरी विधानसभा मतदारसंघासाठी एकूण ३७२ शिक्षकांची सहायक बीएलओ म्हणून नियुक्ती करण्यात आली आहे. यामध्ये दिंडोरी तालुक्यातील २६ शाळांमधील १०० टक्के शिक्षकांचा समावेश असल्याचे सांगितले जात आहे.

या शिक्षकांमार्फत मतदार यादी पुनरीक्षणासाठी अर्ज वाटप, माहिती संकलन, पडताळणी, डिजिटायझेशन तसेच सुनावणी नोटिसा बजावण्याची जबाबदारी पार पाडली जाणार आहे. त्यामुळे त्यांचा मोठा वेळ शाळेबाहेरील कामात जाण्याची शक्यता आहे.

पालकांचा संतप्त सवाल

दरम्यान, “शाळा सुरू असताना सर्व शिक्षक निवडणूक कामावर गेल्यास विद्यार्थ्यांचे शिक्षण कोण सांभाळणार?” असा सवाल पालकांनी उपस्थित केला आहे. निवडणूक प्रक्रिया आणि विद्यार्थ्यांचे शिक्षण या दोन्ही गोष्टींमध्ये समतोल राखण्याचे मोठे आव्हान प्रशासनासमोर उभे राहिले आहे.

प्रशासनाचे स्पष्टीकरण

याबाबत प्रांताधिकारी तथा मतदार नोंदणी अधिकारी डॉ. आप्पासाहेब शिंदे यांनी विद्यार्थ्यांच्या शिक्षणावर कोणताही परिणाम होणार नाही, याची काळजी घेतली जाईल, असे स्पष्ट केले आहे. आवश्यकतेनुसार पर्यायी मनुष्यबळ उपलब्ध करून देण्यासाठी वरिष्ठ स्तरावर मार्गदर्शन मागविण्यात आले असून एनएसएस स्वयंसेवक, निमशासकीय शाळांतील कर्मचारी आणि गावपातळीवरील पात्र व्यक्तींची मदत घेण्याबाबतही विचार सुरू असल्याचे त्यांनी सांगितले.