🚨 लाडक्या बहिणींसाठी मोठी दिलासादायक बातमी! eKYC राहिल्यास पुन्हा संधी; मुख्यमंत्री फडणवीसांची घोषणा

पात्र महिलांचे नुकसान होऊ देणार नाही; eKYC न झालेल्यांसाठी सरकार पुन्हा विंडो सुरू करण्यास तयार

मुंबई | प्रतिनिधी : मुख्यमंत्री लाडकी बहीण योजनेअंतर्गत eKYC प्रक्रिया पूर्ण न झालेल्या पात्र महिलांसाठी राज्य सरकारकडून मोठा दिलासा देणारी घोषणा करण्यात आली आहे. पात्र असूनही eKYC राहिलेल्या महिलांचे नुकसान होऊ देणार नाही, तसेच त्यांच्यासाठी पुन्हा एकदा eKYC विंडो सुरू करण्यास सरकार तयार असल्याचे मुख्यमंत्री देवेंद्र फडणवीस यांनी स्पष्ट केले आहे.

लाडकी बहीण योजना राज्यातील लाखो महिलांसाठी महत्त्वाची ठरली असून या योजनेद्वारे दरमहा 1,500 रुपये आर्थिक सहाय्य दिले जाते. मात्र, लाभार्थी पडताळणी आणि पात्रता निश्चित करण्यासाठी सरकारने eKYC प्रक्रिया राबवली होती. या प्रक्रियेनंतर अनेक अपात्र लाभार्थ्यांना योजनेतून वगळण्यात आले.

मिळालेल्या माहितीनुसार, eKYC पडताळणीनंतर सुमारे 80 लाख महिलांना योजनेतून वगळण्यात आले. यापैकी जवळपास 28 लाख महिलांची eKYC प्रक्रिया अपूर्ण राहिल्याचे समोर आले आहे. त्यामुळे पात्र असूनही अनेक महिलांचा हप्ता थांबला असल्याची चर्चा होती.

याबाबत बोलताना मुख्यमंत्री फडणवीस म्हणाले, “पात्र महिलांचं कोणतंही नुकसान होऊ देणार नाही. ज्या महिलांची eKYC राहिली आहे, त्यांच्यासाठी आम्ही पुन्हा विंडो सुरू करण्यासाठी तयार आहोत.”

 

मे महिन्याचा हप्ता कधी येणार?

लाडकी बहीण योजनेच्या लाभार्थी महिलांचे लक्ष आता मे महिन्याच्या हप्त्याकडे लागले आहे. मात्र, याबाबत अद्याप अधिकृत घोषणा करण्यात आलेली नाही. यापूर्वी मार्च आणि एप्रिल महिन्यांचा संयुक्त हप्ता 15 मे रोजी लाभार्थ्यांच्या खात्यात जमा करण्यात आला होता. त्यामुळे मे महिन्याचा हप्ताही लवकरच जमा होण्याची शक्यता व्यक्त केली जात आहे.

राज्य सरकारकडून यासंदर्भातील अधिकृत सूचना आणि तारखा जाहीर झाल्यानंतरच अंतिम चित्र स्पष्ट होणार आहे.