नवी दिल्ली : कॉकरोच जनता पार्टी (CJP) ने बुधवारी पहिली अधिकृत पत्रकार परिषद घेत संघटनेच्या पुढील आंदोलनाची दिशा स्पष्ट केली. पक्षाचे मुख्य प्रवक्ते सौरव दास यांनी शिक्षण व्यवस्थेतील कथित त्रुटी, परीक्षा घोटाळे आणि विद्यार्थ्यांवरील अन्याय याविरोधात 6 जून रोजी दिल्लीतील जंतर-मंतर येथे मोठे आंदोलन करण्यात येणार असल्याची घोषणा केली.
पत्रकार परिषदेत सौरव दास यांच्यासह विजेता दहिया आणि आशुतोष रांका यांची अधिकृत प्रवक्ते म्हणून घोषणा करण्यात आली. या नियुक्त्यांमुळे सोशल मीडियावरून सुरू झालेल्या CJP चळवळीला अधिक संघटित स्वरूप मिळाल्याचे मानले जात आहे.
यावेळी बोलताना सौरव दास म्हणाले की, “शिक्षण व्यवस्थेत जबाबदारी निश्चित होणे आवश्यक आहे. परीक्षा प्रक्रियेतील अनियमितता, पेपरफुटी, निकालातील चुका आणि विद्यार्थ्यांच्या भविष्याशी खेळणाऱ्या घटनांमुळे देशभरातील युवकांमध्ये प्रचंड संताप आहे.”
CJP ने केंद्रीय शिक्षणमंत्री धर्मेंद्र प्रधान यांच्या राजीनाम्याची मागणी पुन्हा एकदा जोरदारपणे केली. संघटनेच्या म्हणण्यानुसार, लाखो विद्यार्थी विविध परीक्षा व निकाल प्रक्रियेतील त्रुटींमुळे प्रभावित झाले असून याबाबत सरकारकडून ठोस उत्तर मिळालेले नाही.
6 जून रोजी होणाऱ्या आंदोलनासाठी CJP चे संस्थापक अभिजीत दीपके दिल्लीत दाखल होणार असल्याचेही जाहीर करण्यात आले. त्यांच्यासोबत सामाजिक कार्यकर्ते सोनम वांगचुक आणि देशभरातील समर्थक सहभागी होण्याची शक्यता व्यक्त करण्यात आली आहे.
दरम्यान, CJP ने कोणत्याही राजकीय पक्षाशी संबंध नसल्याचा दावा करत ही युवकांच्या प्रश्नांसाठी सुरू असलेली जनआंदोलनात्मक चळवळ असल्याचे स्पष्ट केले. सोशल मीडियावर मोठा पाठिंबा मिळाल्यानंतर आता संघटना प्रत्यक्ष रस्त्यावर उतरून आंदोलनाच्या माध्यमातून सरकारवर दबाव वाढवण्याच्या तयारीत असल्याचे दिसून येत आहे.
