ऑपरेशन टायगर यशस्वी! ठाकरे गटाला मोठा धक्का; 6 खासदारांनंतर आता 20 आमदारांबाबत चर्चांना उधाण - ANN

मुंबई | प्रतिनिधी

महाराष्ट्राच्या राजकारणात पुन्हा एकदा मोठी घडामोड घडली असून उपमुख्यमंत्री एकनाथ शिंदे यांच्या नेतृत्वाखालील शिवसेनेने ठाकरे गटाला आणखी एक मोठा धक्का दिला आहे. ठाकरे गटातील सहा खासदारांनी स्वतंत्र गटाची नोंदणी केल्यानंतर राज्याच्या राजकीय वर्तुळात मोठी खळबळ उडाली आहे.

मिळालेल्या माहितीनुसार, बंडखोर खासदारांनी नवी दिल्ली येथे लोकसभा अध्यक्षांकडे स्वतंत्र गट म्हणून मान्यता मिळवली असून लवकरच ते अधिकृतपणे शिंदे यांच्या शिवसेनेत प्रवेश करणार आहेत. 19 जून रोजी मुंबईत होणाऱ्या शिवसेनेच्या वर्धापनदिन सोहळ्यात या प्रवेशाची घोषणा होण्याची शक्यता आहे.

या घडामोडीनंतर ठाकरे गटाकडे आता केवळ तीन खासदार उरल्याचे बोलले जात असून, पक्षाच्या भवितव्याबाबत विविध स्तरांवर चर्चा सुरू झाली आहे. विशेष म्हणजे, खासदारांनंतर आता आमदार आणि स्थानिक स्वराज्य संस्थांमधील पदाधिकारी यांच्याबाबतही राजकीय तर्कवितर्कांना वेग आला आहे.

शिंदे गटात जाण्याची चर्चा असलेले खासदार	ठाकरे गटाचे विद्यमान 20 आमदार
संजय जाधव	सिद्धार्थ खरात (मेहकर)
संजय देशमुख	गजानन लवाटे (दर्यापूर)
नागेश पाटील आष्टीकर	नितीन देशमुख (बाळापूर)
ओमराजे निंबाळकर	संजय देरकर (वणी)
भाऊसाहेब वाकचौरे	राहुल पाटील (परभणी)
संजय दिना पाटील	सुनील राऊत (विक्रोळी)
–	अनंत नर (जोगेश्वरी पूर्व)
–	सुनील प्रभू (दिंडोशी)
–	हारून खान (वर्सोवा)
–	संजय पोतनीस (कलिना)
–	वरुण सरदेसाई (वांद्रे पूर्व)
–	महेश सावंत (माहीम)
–	आदित्य ठाकरे (वरळी)
–	अजय चौधरी (शिवडी)
–	मनोज जामसुतकर (भायखळा)
–	बाबाजी काळे (खेड-आळंदी)
–	प्रवीण स्वामी (उमरगा)
–	कैलास पाटील (उस्मानाबाद)
–	दिलीप सोपल (बार्शी)
–	भास्कर जाधव (गुहागर)

राजकीय समीकरणांवर परिणाम?

लोकसभा निवडणुकीनंतर राज्यातील शिवसेना राजकारणात पुन्हा एकदा मोठी उलथापालथ होताना दिसत आहे. खासदारांच्या या निर्णयानंतर आगामी स्थानिक स्वराज्य संस्था निवडणुका आणि विधानसभा राजकारणावर त्याचा परिणाम होण्याची शक्यता राजकीय विश्लेषक व्यक्त करत आहेत.

दरम्यान, ठाकरे गटाकडून या घडामोडींवर अधिकृत भूमिका अद्याप स्पष्ट करण्यात आलेली नाही. मात्र, येत्या काही दिवसांत राज्यातील राजकारण आणखी तापण्याची चिन्हे दिसत आहेत.

By Pradnyawant Bagul
Editor, ANN – Accurate News Network