नागपुरातील धक्कादायक प्रकरण उघड; धर्मांतरासाठी दबाव टाकल्याचाही आरोप, दोन आरोपी अटकेत
नागपूर | प्रतिनिधी
नागपुरात भारतीय वायू सेनेतील अधिकाऱ्याच्या पत्नीच्या कथित लैंगिक शोषणाचे धक्कादायक प्रकरण समोर आले आहे. पीडित महिलेने दिलेल्या तक्रारीनुसार, ओळखीच्या व्यक्तीने नशेचे औषध देऊन तिच्यावर अत्याचार केला, त्यानंतर व्हिडिओच्या आधारे ब्लॅकमेल करत लाखो रुपये उकळले आणि धर्मांतरासाठी दबाव टाकला.
या प्रकरणी सोनेगाव पोलिसांनी दोन आरोपींना अटक केली असून तिसऱ्या आरोपीचा शोध सुरू आहे. पोलिसांनी दिलेल्या माहितीनुसार, पीडित महिलेचे पती भारतीय वायू सेनेत कार्यरत आहेत.
काय आहे प्रकरण?
तक्रारीनुसार, फेब्रुवारी 2025 मध्ये अयाज ताज मदारे नावाच्या व्यक्तीने प्लॉट खरेदीच्या निमित्ताने पीडित महिलेशी संपर्क साधला. त्यानंतर वर्धा रोडवरील एका हॉटेलमध्ये बोलावून कथितपणे नशायुक्त पेय दिले. महिला बेशुद्ध झाल्यानंतर तिच्यावर अत्याचार करण्यात आल्याचा आरोप आहे.
पीडितेचा दावा आहे की, आरोपीने या घटनेचे फोटो आणि व्हिडिओ तयार करून त्याच्या आधारे तिला वारंवार ब्लॅकमेल केले. तसेच तिच्याकडून सुमारे 3 लाख रुपयांहून अधिक रक्कम उकळण्यात आली.
धर्मांतरासाठी दबावाचा आरोप
महिलेने आपल्या तक्रारीत धर्मांतरासाठी दबाव टाकण्यात आल्याचाही आरोप केला आहे. काही धार्मिक विधी करून धर्मांतर पूर्ण झाल्याचे सांगण्यात आले, तसेच पुन्हा अत्याचाराचा प्रयत्न करण्यात आल्याचा दावा तिने केला आहे.
पतीला माहिती दिल्यानंतर तक्रार
घटनेबाबत काही काळ मौन बाळगलेल्या महिलेने तीन दिवसांपूर्वी घरी आलेल्या आपल्या पतीला संपूर्ण प्रकार सांगितला. त्यानंतर सोनेगाव पोलीस ठाण्यात तक्रार दाखल करण्यात आली.
दोन आरोपी अटकेत
पोलिसांनी अयाज ताज मदारे आणि अमीन शेख या दोन आरोपींना अटक केली आहे. तर मध्य प्रदेशातील एका संशयित आरोपीचा शोध सुरू आहे.
या प्रकरणी बलात्कार, खंडणी, धर्मांतरासाठी दबाव, तसेच संबंधित कायद्यांअंतर्गत गुन्हे दाखल करण्यात आले असून पुढील तपास सुरू आहे.
(टीप : हे सर्व आरोप पीडितेच्या तक्रारीवर आधारित असून प्रकरणाचा तपास सुरू आहे. न्यायालयीन प्रक्रियेनंतरच अंतिम सत्य स्पष्ट होईल.)
