नाशिक विधान परिषद निवडणुकीत गोकुळ गीते यांचा धक्कादायक विजय; महायुतीला मोठा धक्का

नाशिक | प्रतिनिधी

नाशिक स्थानिक स्वराज्य संस्था मतदारसंघाच्या विधान परिषद निवडणुकीत अपक्ष उमेदवार गोकुळ गीते यांनी अनपेक्षित विजय मिळवत महायुतीला मोठा धक्का दिला आहे. महायुतीचे अधिकृत उमेदवार नरेंद्र दराडे यांचा पराभव झाल्याने राज्याच्या राजकीय वर्तुळात मोठी खळबळ उडाली आहे.

आज झालेल्या मतमोजणीत गोकुळ गीते यांना 357 मते मिळाली, तर महायुतीचे उमेदवार नरेंद्र दराडे यांना 247 मते मिळाली. 13 मते बाद ठरली.

निवडणुकीपूर्वी उपमुख्यमंत्री एकनाथ शिंदे, मंत्री गिरीश महाजन, उदय सामंत यांच्यासह महायुतीतील अनेक वरिष्ठ नेत्यांनी गोकुळ गीते यांनी उमेदवारी मागे घ्यावी यासाठी प्रयत्न केले होते. मात्र गीते यांनी माघार न घेता निवडणुकीच्या रिंगणात राहण्याचा निर्णय कायम ठेवला.

या मतदारसंघात महायुतीकडे संख्याबळ असतानाही निकाल उलट लागल्याने महायुतीतील अंतर्गत नाराजी आणि क्रॉस व्होटिंगची चर्चा रंगली आहे. निवडणुकीत महायुतीकडे सुमारे 466 मतांचे संख्याबळ असल्याचे मानले जात होते. तरीही गोकुळ गीते यांनी विजय मिळवल्याने अनेक राजकीय समीकरणांना धक्का बसला आहे.

मतदानाच्या अंतिम टप्प्यात गोकुळ गीते यांच्या समर्थकांनी मतदारांशी थेट संपर्क साधत प्रभावी रणनीती राबवली. याच रणनीतीमुळे गीते यांना अपेक्षेपेक्षा जास्त मते मिळाल्याचे राजकीय विश्लेषकांचे मत आहे.

नाशिक विधान परिषद निवडणुकीचा हा निकाल आगामी स्थानिक स्वराज्य संस्था निवडणुका तसेच उत्तर महाराष्ट्रातील राजकीय समीकरणांवर परिणाम करणारा ठरणार असल्याची चर्चा सुरू झाली आहे.