Uddhav Thackeray: शेतकरी मेला तरी चालेल, पण शक्तिपीठ झाला पाहिजे, शेतकऱ्यांच्या घरातील दिवे, वंशाचे दिवे विझत असताना कसले दिवे लावताय? दुष्काळ का जाहीर करत नाही; उद्धव ठाकरेंचा हल्लाबोल

Uddhav Thackeray: शिवसेना पक्षप्रमुख आणि महाराष्ट्राचे माजी मुख्यमंत्री उद्धव ठाकरे यांनी छत्रपती संभाजीनगर येथील आपल्या दौऱ्यादरम्यान राज्य सरकारवर अत्यंत कडाडून टीका केली आहे. मराठवाडा आणि महाराष्ट्राच्या हिूतासाठी आम्ही एकेकाळी भारतीय जनता पक्षासोबत गेलो होतो, मात्र नंतर त्यांचा खरा चेहरा समोर आल्यानंतर आपण त्यांची साथ सोडल्याचे त्यांनी स्पष्ट केले. आपण मुख्यमंत्री असताना राज्यातील शेतकऱ्यांना कर्जमुक्ती दिली आणि ‘शिवभोजन थाळी’ ही महत्त्वाची योजना सुरू केली, अशी आठवण त्यांनी यावेळी करून दिली.

सध्याच्या राजकीय परिस्थितीवर बोट ठेवत उद्धव ठाकरे यांनी राज्यकर्त्यांना सवाल केला की, “तुझं माझं करण्यापेक्षा आता तुम्ही जनतेसाठी काय करणार आहात? नैसर्गिक आपत्ती ही कोणाच्या हातात नसते, पण संकट आल्यावर आता तुमची नेमकी तयारी काय आहे?” एल निनोचे हवामान खात्याचे भाकीत आधीच वर्तवण्यात आले होते, तरीही प्रशासनाने योग्य ती पूर्वतयारी का केली नाही, असा संतप्त सवाल त्यांनी उपस्थित केला. Uddhav Thackeray संदर्भातील माहिती येथे दिली आहे.

शेतकऱ्यांच्या वंशाचे दिवे विझत असताना कसले उत्सव? – Uddhav Thackeray

राज्यातील दुष्काळी परिस्थिती आणि शेतकऱ्यांच्या आत्महत्यांवर बोलताना उद्धव ठाकरे यांनी सरकारवर अत्यंत गंभीर शब्दांत प्रहार केला. ते म्हणाले की, “शेतकरी मेला तरी चालेल, पण आम्हाला शक्तिपीठ महामार्ग झालाच पाहिजे,” अशी या सरकारची भूमिका दिसत आहे. शेतकऱ्यांच्या घरातील दिवे आणि वंशाचे दिवे विझत असताना, त्यांची कुटुंबे उद्ध्वस्त होत असताना हे नेते पंतप्रधानांच्या वाढदिवसाचे दिवे लावून काय साजरीकरण करत आहेत? असा सवाल त्यांनी केला. तसेच, राज्य सरकार अजूनही अधिकृतपणे दुष्काळ का जाहीर करत नाही? असा जाबही त्यांनी विचारला. Uddhav Thackeray संदर्भातील माहिती येथे दिली आहे.

मराठवाड्यातील नेतृत्व संपवण्याचा घाट – Uddhav Thackeray

छत्रपती संभाजीनगर दौरयात उद्धव ठाकरे यांनी उपमुख्यमंत्री देवेंद्र फडणवीस यांच्यावरही जोरदार निशाणा साधला. ते म्हणाले की, हे सरकार पद्धतशीरपणे मराठवाड्यातील नेतृत्व संपवण्याचे काम करत आहे. देवेंद्र फडणवीस हे मराठवाड्यात येऊन आम्ही गोदावरी खोऱ्यात किंवा या भागात पाणी कसे आणणार, हे किती वेळा सांगणार? असा उपरोधिक सवाल त्यांनी केला. स्वर्गीय गोपीनाथ मुंडे आणि प्रमोद महाजन यांनीच भाजपची ओळख महाराष्ट्रात करून दिली होती, याची आठवण त्यांनी करून दिली. मात्र, गोपीनाथ मुंडे यांच्या मृत्यूचे गूढ अद्याप उलघडलेले नाही, अशी खंत त्यांनी व्यक्त केली. आपण यावर कोणताही थेट आरोप किंवा संशय घेत नसलो, तरी महाराष्ट्राला न्याय देणारा असा नेता आज आपल्यात नाही, आणि या मृत्यूची सखोल चौकशी व्हायलाच हवी, अशी आग्रही मागणी त्यांनी केली.

महाराष्ट्रात जाती-जातींमध्ये भिंती उभ्या केल्याचा आरोप

भारतीय जनता पक्षावर टीका करताना ठाकरे म्हणाले की, हा पक्ष पूर्णपणे सत्तापिपासू आहे. सत्तेसाठी हे लोक काहीही करू शकतात. संपूर्ण देशामध्ये या लोकांनी आधी हिंदू आणि मुस्लिम असा वाद निर्माण करून आग लावली, मात्र आता बऱ्याच प्रमाणावर मुस्लिम बांधवही शिवसेनेसोबत येत आहेत, कारण त्यांना बाळासाहेबांचे आणि शिवसेनेचे खरे हिंदुत्व काय आहे, हे आता कळले आहे. आता हे लोक केवळ हिंदू-मुस्लिमपुरते मर्यादित राहिलेले नाहीत, तर त्यांनी महाराष्ट्रात जातीपातींच्या भिंती उभ्या केल्या आहेत.

महाराष्ट्रात मराठा समाजाला पेटवून ठेवले आहे, त्यांच्या विरोधात ओबीसींना उभे केले जात आहे, तिकडे धनगर समाजाला आरक्षणावरून गुंतवले आहे, तर एका बाजूला कुणबी आणि आदिवासी समाजांमध्ये संभ्रम निर्माण केला जात आहे. मनोज जरांगे पाटील हे मराठा आरक्षणासाठी मुंबईच्या दिशेने संघर्ष करत असताना आणि स्वतःचा जीव पणाला लावून लढत असताना, दुसरीकडे राज्याचे मुख्यमंत्री लंडनमध्ये जाऊन स्वतःसाठी पुरस्कार घेत आहेत, अशा शब्दांत त्यांनी मुख्यमंत्री एकनाथ शिंदे यांच्यावर कडक टीका केली.

कोपराला गूळ लावणं बंद करा: जनतेला साष्टांग दंडवत

महाराष्ट्रातील तमाम जनतेला आवाहन करताना उद्धव ठाकरे म्हणाले की, मी महाराष्ट्रातील सर्व जाती-पातीच्या नागरिकांना, अगदी मनोज जरांगे पाटील यांना, ओबीसी समाजाला, धनगर आणि आदिवासी बांधवांना हात जोडून नव्हे तर साष्टांग नमस्कार घालून विनंती करतो की, या सरकारचा हा आपापसात भांडण लावण्याचा डाव वेळीच हाणून पाडा. हे सरकार निवडणुका जवळ आल्या की तुमचे सर्व प्रश्न मान्य असल्याचा आव आणून गुलाल उधळतात, मात्र निवडणुका संपल्या की तुम्हाला पुन्हा तसेच वाऱ्यावर सोडून तुमच्या जिवाशी खेळतात.

ते पुढे म्हणाले की, ही राजकीय मंडळी आपल्याला केवळ कोपराला गूळ लावून फशी पाडत आहेत. म्हणूनच आपण सर्वानी जातीपातीचे भेद विसरून महाराष्ट्राची लेकरं म्हणून, एकाच मातीची मुलं म्हणून एकत्र आले पाहिजे. जर आपण एकजुटीने लढलो, तर कोणाची हिंमत नाही की आपल्याला न्याय मिळणार नाही. अहमद शाह अब्दालीने मराठ्यांची हीच मुख्य नस पकडली होती की, हे मराठे जातीपातींमध्ये विखुरलेले आहेत आणि कधीही एकत्र येऊ शकत नाहीत. याच दुहीच्या आणि फुटीच्या बीजावर हे राज्यकर्ते आज सत्तेचा उपभोग घेत आहेत आणि सर्वसामान्य जनतेला संकटात सडवत ठेवत आहेत. किती काळ हा अन्याय सहन करणार, असा सवाल करत जनतेने आता एकत्र येण्याची वेळ आली असल्याचे उद्धव ठाकरे यांनी शेवटी सांगितले.