🚨 आयुष्मान भारत डिजिटल मिशनला रायगडातून वेग; ‘मॉडेल जिल्हा’ उपक्रमाचे पनवेलमध्ये उद्घाटन

▶ डिजिटल आरोग्य क्रांतीच्या दिशेने महाराष्ट्राचे मोठे पाऊल; नागरिकांना अधिक सुलभ व पारदर्शक आरोग्य सेवा मिळणार

अलिबाग | प्रतिनिधी : केंद्र सरकारच्या महत्त्वाकांक्षी आयुष्मान भारत डिजिटल मिशन (ABDM) अंतर्गत रायगड जिल्ह्याची ‘मॉडेल जिल्हा’ म्हणून निवड करण्यात आली असून, या उपक्रमाच्या प्रभावी अंमलबजावणीसाठी पनवेल येथील आद्य क्रांतीवीर वासुदेव बळवंत फडके नाट्यगृहात मंगळवारी ‘रायगड मॉडेल जिल्हा कार्यशाळे’चे उद्घाटन करण्यात आले.

यावेळी राष्ट्रीय आरोग्य प्राधिकरणाचे मुख्य कार्यकारी अधिकारी (CEO) डॉ. सुनीलकुमार बर्नवाल यांनी आरोग्य व्यवस्थेचे डिजिटायझेशन हे काळाची गरज असल्याचे सांगत, नागरिकांचे आरोग्य उत्तम राखण्यासाठी डिजिटल तंत्रज्ञानाचा प्रभावी वापर आवश्यक असल्याचे प्रतिपादन केले.

राज्याचे आरोग्यमंत्री प्रकाश आबिटकर आणि राज्यमंत्री मेघना साकोरे-बोर्डीकर यांच्या मार्गदर्शनाखाली आयोजित या कार्यशाळेला राष्ट्रीय आरोग्य प्राधिकरणाचे संचालक डॉ. पंकजकुमार अरोरा, सार्वजनिक आरोग्य विभागाचे सचिव ई. रविंद्रन, अतिरिक्त अभियान संचालक जगन्नाथ वीरकर, सहसंचालक डॉ. सुनीता गेहोलोत, उपसंचालक डॉ. अशोक नांदापूरकर, पनवेल महापालिका आयुक्त मंगेश चितळे, जिल्हा आरोग्य अधिकारी डॉ. स्वाती नेहुलकर यांच्यासह अनेक वरिष्ठ अधिकारी उपस्थित होते.

नागरिकांना मिळणार डिजिटल आरोग्य सुविधा

या उपक्रमाचा मुख्य उद्देश नागरिकांना अधिक सुलभ, पारदर्शक आणि परिणामकारक आरोग्य सेवा उपलब्ध करून देणे तसेच संपूर्ण आरोग्य व्यवस्थेला डिजिटल स्वरूप देणे हा आहे. रायगड जिल्ह्यातील ३८३ शासकीय आरोग्य संस्थांमध्ये आधीच ABDM-संलग्न HMIS प्रणाली कार्यान्वित करण्यात आली असून, आता खासगी रुग्णालये व वैद्यकीय संस्थांचाही या उपक्रमात व्यापक सहभाग वाढविण्यात येणार आहे.

‘रायगड मॉडेल’ राज्यासाठी ठरणार मार्गदर्शक

सार्वजनिक आरोग्य विभागाचे सचिव ई. रविंद्रन यांनी रायगड जिल्ह्यातील या प्रयोगाच्या यशानंतर संपूर्ण महाराष्ट्रात हे मॉडेल राबविण्याचा मानस व्यक्त केला. तर डॉ. पंकजकुमार अरोरा यांनी आयुष्मान भारत डिजिटल मिशनची तांत्रिक माहिती दिली. अतिरिक्त अभियान संचालक जगन्नाथ वीरकर यांनी प्रशासनिक यंत्रणा व अंमलबजावणीच्या प्रक्रियेवर सविस्तर मार्गदर्शन केले.

डिजिटल आरोग्य क्षेत्रात महाराष्ट्राची मोठी झेप

महाराष्ट्राने डिजिटल आरोग्य क्षेत्रात उल्लेखनीय प्रगती केली आहे. राज्यात आतापर्यंत ७.१२ कोटी नागरिकांचे ‘आभा आयडी’ (ABHA ID) तयार झाले आहेत. तसेच ९६ हजारांहून अधिक आरोग्य व्यावसायिक आणि ३४ हजारांपेक्षा जास्त आरोग्य संस्थांची नोंदणी करण्यात आली आहे. राज्यातील १० जिल्ह्यांमध्ये मायक्रोसाईट प्रकल्प राबवून खासगी क्षेत्राचा सहभाग वाढविला जात असून, २.३८ कोटींपेक्षा अधिक आरोग्य नोंदी डिजिटल स्वरूपात लिंक करण्यात आल्या आहेत.

६५० हून अधिक प्रतिनिधींचा सहभाग

या कार्यशाळेत राष्ट्रीय आरोग्य प्राधिकरण, सार्वजनिक आरोग्य विभाग, राष्ट्रीय आरोग्य अभियान, विविध शासकीय व खासगी आरोग्य संस्था तसेच इंडियन मेडिकल असोसिएशन (IMA) चे पदाधिकारी यांच्यासह सुमारे ६५० प्रतिनिधींनी सहभाग नोंदविला.

कार्यशाळेत आभा आयडी निर्मिती, डिजिटल आरोग्य नोंदी, हेल्थ फॅसिलिटी रजिस्ट्री, हेल्थकेअर प्रोफेशनल रजिस्ट्री यांसारख्या विषयांवर तज्ज्ञांनी मार्गदर्शन केले.

रायगड जिल्ह्याची ‘मॉडेल जिल्हा’ म्हणून झालेली निवड महाराष्ट्राच्या डिजिटल आरोग्य क्षेत्रासाठी महत्त्वाचा टप्पा मानली जात असून, येथील यशस्वी अनुभव राज्यातील इतर जिल्ह्यांसाठी मार्गदर्शक ठरणार असल्याचा विश्वास प्रशासनाने व्यक्त केला आहे.