गिरीश महाजनांच्या मध्यस्थीला यश; रोहित पवारांनी तीन दिवसांनंतर अन्नत्याग आंदोलन मागे घेतले - ANN

22 जूनपूर्वी मुख्यमंत्र्यांसोबत बैठक; कर्जमाफीच्या अटींवर फेरविचार करण्याचे सरकारचे आश्वासन

पंढरपूर | प्रतिनिधी

शेतकऱ्यांसाठी सरसकट कर्जमाफीची मागणी करत राष्ट्रवादी काँग्रेस (शरदचंद्र पवार) पक्षाचे आमदार रोहित पवार यांनी पंढरपूर येथे सुरू केलेले अन्नत्याग आंदोलन अखेर तीन दिवसांनंतर मागे घेतले. राज्याचे मंत्री गिरीश महाजन यांच्या मध्यस्थीनंतर आणि सरकारकडून सकारात्मक चर्चेचे आश्वासन मिळाल्यानंतर रोहित पवार यांनी आंदोलन स्थगित करण्याची घोषणा केली.

रोहित पवार यांनी सांगितले की, मुख्यमंत्री देवेंद्र फडणवीस यांनी 22 जूनपूर्वी शेतकरी प्रश्नांवर सविस्तर चर्चा करण्यासाठी बैठक बोलावण्याचे आश्वासन दिले आहे. सरकार शेतकऱ्यांच्या मागण्यांबाबत सकारात्मक असून कर्जमाफी योजनेतील अटींबाबत फेरविचार करण्याची तयारी दर्शविली आहे.

पवार म्हणाले की, राज्य सरकारने जाहीर केलेल्या कर्जमाफी योजनेला पुण्यश्लोक अहिल्यादेवी होळकर यांचे नाव देणे स्वागतार्ह आहे. मात्र, योजनेतील अनेक अटींमुळे मोठ्या प्रमाणावर शेतकरी लाभापासून वंचित राहण्याची शक्यता आहे. 2019 मधील महात्मा फुले कर्जमाफी योजनेचा लाभ घेतलेल्या शेतकऱ्यांनाही नव्या योजनेचा लाभ मिळावा, अशी त्यांची प्रमुख मागणी आहे.

याशिवाय नियमितपणे कर्जफेड करणाऱ्या शेतकऱ्यांना देण्यात येणाऱ्या 50 हजार रुपयांच्या प्रोत्साहनपर लाभाची मर्यादा वाढविण्याची मागणीही त्यांनी केली. तसेच अटींशिवाय सरसकट कर्जमाफी लागू करण्याची आवश्यकता असल्याचे त्यांनी नमूद केले.

यावेळी रोहित पवार यांनी मंत्री गिरीश महाजन यांच्या प्रयत्नांचे कौतुक करत, “शेतकऱ्यांच्या हितासाठी सरकारसोबत सकारात्मक चर्चा व्हावी, हीच आमची भूमिका आहे,” असे सांगितले. त्यांनी 4 जुलै रोजी शेतकऱ्यांच्या प्रश्नांवर मोठे आंदोलन उभारण्याचाही इशारा दिला.

दरम्यान, मंत्री गिरीश महाजन यांनी सांगितले की, सरकार शेतकरी हितासाठी कटिबद्ध असून कर्जमाफी योजनेत सुधारणा करण्यासंदर्भात चर्चा होऊ शकते. जवळपास 37 हजार कोटी रुपयांपर्यंतच्या कर्जमाफीचा विचार सुरू असून मुख्यमंत्र्यांच्या नेतृत्वाखाली सकारात्मक निर्णय घेतला जाईल, असा विश्वास त्यांनी व्यक्त केला.

रोहित पवार यांनी यावेळी एक रुपयातील पीक विमा योजना पुन्हा सुरू करण्याची मागणी केली. यंदा पावसाचे प्रमाण कमी राहण्याची शक्यता असल्याने शेतकऱ्यांना अधिक संरक्षण देणे आवश्यक असल्याचे त्यांनी नमूद केले.

सरकारसोबत होणाऱ्या बैठकीसाठी स्वाभिमानी शेतकरी संघटनेचे नेते राजू शेट्टी, शेतकरी नेते रविकांत तुपकर, किसान सभेचे डॉ. अजित नवले, शेकापचे जयंत पाटील, शशिकांत शिंदे आणि हर्षवर्धन सपकाळ यांसह विविध शेतकरी संघटनांचे प्रतिनिधी उपस्थित राहणार असल्याची माहितीही त्यांनी दिली.

आता 22 जूनपूर्वी होणाऱ्या बैठकीत सरकार कर्जमाफीच्या अटींमध्ये कोणते बदल करते आणि शेतकऱ्यांच्या प्रमुख मागण्यांवर काय निर्णय घेते, याकडे राज्यातील लाखो शेतकऱ्यांचे लक्ष लागले आहे.

By Pradnyawant Bagul
Editor, ANN – Accurate News Network