प्रसिद्ध सोशल मीडिया इन्फ्लुएन्सर मानसीचा संशयास्पद मृत्यू; हुंडाबळीचा आरोप, सहा जणांविरोधात गुन्हा दाखल

लखनऊ | प्रतिनिधी

सोशल मीडिया क्षेत्रात सक्रिय असलेल्या तरुण इन्फ्लुएन्सर मानसी हिचा सासरच्या घरी संशयास्पद परिस्थितीत मृत्यू झाल्याने खळबळ उडाली आहे. मानसीच्या कुटुंबीयांनी तिच्या पतीसह सासरच्या मंडळींवर हुंड्यासाठी छळ केल्याचा गंभीर आरोप करत पोलिसांत तक्रार दाखल केली आहे. या प्रकरणी पोलिसांनी सहा जणांविरोधात गुन्हा नोंदवून तपास सुरू केला आहे.

मिळालेल्या माहितीनुसार, 2024 मध्ये मानसीचे लग्न सागर राजपूत याच्यासोबत झाले होते. लग्नावेळी मोठ्या प्रमाणात रोख रक्कम, भेटवस्तू आणि इतर साहित्य देण्यात आले होते. मात्र, लग्नानंतरही अतिरिक्त हुंड्याच्या स्वरूपात कार आणि पैशांची मागणी करण्यात येत असल्याचा आरोप तिच्या कुटुंबीयांनी केला आहे.

मानसीला वारंवार मानसिक व शारीरिक त्रास दिला जात होता. याबाबत तिने अनेकदा आपल्या कुटुंबीयांना माहिती दिली होती. दोन्ही कुटुंबांमध्ये वाद मिटवण्यासाठी नातेवाईकांनी अनेकदा मध्यस्थी करण्याचाही प्रयत्न केल्याचे सांगितले जात आहे.

शनिवारी मानसीच्या मृत्यूची माहिती कुटुंबीयांना देण्यात आली. सासरच्या मंडळींकडून आत्महत्येचा दावा करण्यात आला असला, तरी कुटुंबीयांनी तिची हत्या करून आत्महत्येचा बनाव रचल्याचा आरोप केला आहे. त्यामुळे या मृत्यूबाबत संशय अधिक गडद झाला आहे.

कुटुंबीयांच्या तक्रारीनंतर पोलिसांनी पती सागर राजपूत, सासरे राजेश राजपूत, दीर अनु, नणंदा बरखा व चांदनी तसेच आत्या-सासू आशा यांच्याविरोधात हुंडाबळीचा गुन्हा दाखल केला आहे.

पोलिसांकडून सध्या सागर राजपूत याची चौकशी सुरू असून मृत्यूमागील नेमके कारण शोधण्यासाठी फॉरेन्सिक पुरावे, नातेवाईकांचे जबाब आणि डिजिटल संवादाची माहिती तपासली जात आहे. या प्रकरणाचा तपास सुरू असून पुढील अहवालाची प्रतीक्षा आहे.

दरम्यान, या घटनेमुळे हुंडाबळी आणि विवाहित महिलांवरील कौटुंबिक अत्याचाराचा मुद्दा पुन्हा एकदा चर्चेत आला आहे.