🚨 PSI बनून फिरत होती तरुणी; एका छोट्याशा चुकीने उडाला भांडाफोड!

डॉक्टरांवर प्रभाव पाडण्यासाठी घातली पोलिसांची वर्दी; नेमप्लेटमधील चुकामुळे बनावट महिला PSI पोलिसांच्या जाळ्यात

पुणे : पोलिसांची वर्दी परिधान करून स्वतःला पोलीस उपनिरीक्षक (PSI) म्हणून सादर करणाऱ्या एका 25 वर्षीय तरुणीचा पुण्यातील कॅम्प परिसरात पर्दाफाश झाला आहे. डॉक्टरांची भेट घेण्यासाठी आणि प्रभाव निर्माण करण्याच्या उद्देशाने ती खाकी वर्दीत फिरत होती. मात्र, तिच्या गणवेशातील एका छोट्याशा चुकीने संपूर्ण बनाव उघडकीस आला.

लष्कर पोलिसांनी दिलेल्या माहितीनुसार, समिना आस्तिक इनामदार उर्फ समिना आलू पठाण (वय 25, रा. म्हाळुंगे) असे अटक करण्यात आलेल्या तरुणीचे नाव आहे. तिने पोलीस उपनिरीक्षकाच्या दर्जाची खाकी वर्दी, स्टार आणि अधिकृत मानचिन्हे वापरून स्वतःला पोलीस अधिकारी असल्याचे भासवले होते.

नेमप्लेटमधील चुकामुळे संशय

समिना एका नामांकित रुग्णालयात PSI च्या वेशात डॉक्टरांची भेट घेण्यासाठी आली होती. त्याचवेळी अधिकृत कामासाठी तेथे उपस्थित असलेले सहाय्यक फौजदार महेश शिंदे यांच्या नजरेस तिच्या गणवेशावरील नेमप्लेट आली.

पोलीस गणवेशातील प्रत्येक बाब ठराविक नियमांनुसार असते. मात्र समिनाने नेमप्लेट चुकीच्या ठिकाणी लावल्यामुळे शिंदे यांना संशय आला. त्यांनी तात्काळ तिची चौकशी सुरू केली.

“मी बाणेर पोलीस ठाण्यात कार्यरत आहे”

चौकशीदरम्यान समिनाने आपण बाणेर पोलीस ठाण्यात कार्यरत PSI असल्याचे सांगितले. मात्र तिच्या उत्तरांमध्ये विसंगती आढळल्याने संशय अधिक बळावला.

यानंतर महिला पोलीस कर्मचाऱ्यांना घटनास्थळी बोलावण्यात आले. ओळखपत्र आणि सेवा नोंदींबाबत विचारणा केली असता समिना कोणत्याही पोलीस खात्यात कार्यरत नसल्याचे स्पष्ट झाले.

चौकशीत कबुली

पोलिसांच्या कसून चौकशीनंतर समिनाने आपण पोलीस अधिकारी नसल्याची कबुली दिली. लोकांवर प्रभाव पाडण्यासाठी आणि पोलिसांचा रुबाब दाखवण्यासाठी तिने हा बनावट गणवेश परिधान केल्याचेही उघड झाले.

गुन्हा दाखल

लष्कर पोलिसांनी समिनाला ताब्यात घेत तिच्याविरोधात संबंधित कलमान्वये गुन्हा दाखल केला आहे. या प्रकरणामागे आणखी काही कारणे आहेत का, याचा तपास सुरू आहे.

एका बारीक चुकीमुळे उघडकीस आलेल्या या प्रकरणाची सध्या पुण्यात जोरदार चर्चा सुरू आहे.