पुणे विषारी दारू प्रकरणात मोठी कारवाई; भिवंडीतून 5,929 किलो रसायन जप्त, FDA ची धडक मोहीम

15.09.2026 2 Min Read

पुणे | प्रतिनिधी

पुणे आणि पिंपरी-चिंचवड परिसरात मिथेनॉल मिश्रित विषारी गावठी दारू प्रकरणात आतापर्यंत 22 जणांचा मृत्यू झाल्यानंतर राज्यभरात खळबळ उडाली आहे. या पार्श्वभूमीवर अन्न व औषध प्रशासन (FDA) विभागाने मोठी कारवाई करत भिवंडी येथून दारू निर्मितीसाठी वापरल्या जाणाऱ्या रसायनाचा मोठा साठा जप्त केला आहे.

अन्न व औषध प्रशासनाचे आयुक्त तुकाराम मुंढे यांच्या आदेशानंतर तपासाची व्याप्ती वाढवण्यात आली. तपासादरम्यान पुण्यातील विषारी दारू तयार करण्यासाठी वापरण्यात आलेल्या रसायनाचा मोठा साठा भिवंडीतील एका गोदामात असल्याची माहिती समोर आली होती.

त्यानुसार FDA च्या पथकाने भिवंडी येथील ‘रेक्स इंटरनॅशनल’ कंपनीच्या गोदामावर छापा टाकून तब्बल 5 हजार 929 किलो रसायन जप्त केले. या रसायनाचा वापर विषारी दारू तयार करण्यासाठी झाल्याचा संशय व्यक्त केला जात आहे. या कारवाईमुळे तपासाला महत्त्वाचे धागेदोरे मिळाल्याचे सांगण्यात येत आहे.

पुणे विषारी दारू प्रकरण नेमके काय?

पुणे जिल्ह्यातील दापोडी परिसरात मंगळवारी रात्री आणि बुधवारी सकाळी काही नागरिकांनी गावठी दारूचे सेवन केले होते. दारू प्यायल्यानंतर संबंधितांना डोळ्यांची जळजळ, चक्कर येणे, अंधारी येणे, श्वास घेण्यास त्रास, छातीत दुखणे आणि तोंडातून फेस येणे अशी गंभीर लक्षणे दिसून आली.

अनेकांना तातडीने रुग्णालयात दाखल करण्यात आले. मात्र काही जणांचा उपचारापूर्वीच मृत्यू झाला. आतापर्यंत 22 जणांचा मृत्यू झाल्याची नोंद असून काही रुग्णांची प्रकृती अद्याप गंभीर असल्याने मृतांचा आकडा वाढण्याची भीती व्यक्त केली जात आहे.

तुकाराम मुंढेंच्या नेतृत्वाखाली FDA ची धडक मोहीम

अन्न व औषध प्रशासनाचे आयुक्तपद स्वीकारल्यानंतर तुकाराम मुंढे यांनी राज्यभरात भेसळ, अवैध औषध विक्री आणि दिशाभूल करणाऱ्या जाहिरातींविरोधात कठोर मोहीम सुरू केली आहे.

या मोहिमेअंतर्गत राज्यातील विविध भागांतून तब्बल 73 लाख रुपयांहून अधिक किमतीचा औषधसाठा जप्त करण्यात आला आहे. तसेच सात जिल्ह्यांमधील 12 आयुर्वेदिक औषध विक्री आस्थापनांवर कारवाई करण्यात आली आहे.

मुंबई, पुणे, नागपूर, नाशिक, कोकण, अमरावती आणि छत्रपती संभाजीनगर येथे विविध ठिकाणी छापे टाकून मोठ्या प्रमाणात औषधसाठा जप्त करण्यात आला आहे. याशिवाय पुण्यात दोन ॲलोपॅथीसदृश औषधांचा सुमारे 21 लाख रुपयांचा साठाही जप्त करण्यात आला.

तपासाला वेग

पुण्यातील विषारी दारू प्रकरणाची चौकशी विविध यंत्रणांकडून सुरू असून रसायन पुरवठा साखळी, उत्पादन केंद्रे आणि वितरण नेटवर्क यांचा शोध घेतला जात आहे. या प्रकरणात आणखी काही धक्कादायक खुलासे होण्याची शक्यता व्यक्त केली जात आहे.